ავტორი: კახა ფხაკაძე

ამ სტატიაში გაგაცნობთ თუ რას წარმოადგენს გამოსახულების სტილი (Picture Style) ციფრულ ფოტოგრაფიაში და რა შესაძლებლობებს იძლევა ეს ინსტრუმენტი. დავიწყებ იმით, რომ ფოტოკამერაში არსებული ამ რეგულატორით შესაძლებელია ციფრულ ფოტოს შეეცვალოს 4 პარამეტრი - სიმკვეთრე, კონტრასტულობა, გაჯერებულობა და ფერის ტონი.ვნახოთ რას ცვლის თითოეული მათგანი. "სიმკვეთრე" არეგულირებს კონტურულ სიმკვეთრეს, უმატებს ან უკლებს მას.  "კონტრასტულობა" არეგულირებს ღია და მუქ ტონებს შორის არსებულ განსხვავებას, "გაჯერებულობა" ცვლის არსებული ფერების ინტენსივობას, "ფერის ტონი" კი ცვლის კანის ფერს ყვითელსა და წითელს შორის. 

ეს რეგულაციები სხვადასხვა შედეგს იძლევა და ფოტოგრაფის არჩევანზეა დამოკიდებული. მანიპულაციები ფოტოკამერაში RAW მონაცემების დამუშავებისას სრულდება, რის შედეგადაც მიიღება გრაფიკული ფორმატის (JPEG) ფოტო. ცხადია, ასეთივე მანიპულაციების შესრულება შესაძლებელია RAW ფაილის დამოუკიდებელი დამუშავებისას, მაგრამ ამ შემთხვევაში, მხოლოდ ფოტოკამერის შიდა პროცესებზე გავაგრძელოთ საუბარი.

დათქმულ სტილებში მოცემულია: "სტანდარტული", "პორტრეტი", "პეიზაჟი", "ზუსტი", "შავ-თეთრი/მონოქრომული".
გარდა ამისა, ჩამონათვალში აუცილებლად დაგხვდებათ 3 სამომხმარებლო სტილი, რაც საშუალებას გვაძლევს ჩვენი სურვილის მიხედვით დავაინსტალიროთ ჩვენთვის საჭირო სტილის პროფილი. აქვე უნდა ითქვას, რომ სტილის შექმნა დამოუკიდებლადაც შეგვიძლია - ამისთვის მწარმოებელი ხელმისაწვდომს ხდის სპეციალურ პროგრამას - Picture Style Editor, რომლის გადმოწერა Canon-ის ოფიციალური საიტიდან არის შესაძლებელი. ამ პროგრამაში მუშაობა დამოუკიდებელი შესწავლის საგანია, მე კი იმას მოგითხრობთ, თუ როგორ დავაინსტალიროთ უკვე შექმნილი სტილის პროფილი. ასეთ დამატებით პროფილებს გვთავაზობს როგორც უშუალოდ მწარმოებელი, ასევე დამოუკიდებელი ავტორები. უშუალოდ Canon საშუალებას გვაძლევს სრულიად უფასოდ ბმულიდან გადმოვწეროთ და დავაინსტალიროთ 7 სტილი, ხოლო სხვა დამოუკიდებელი ავტორების მიერ შექმნილი სტილები ათეულობითაა ინტერნეტ სივრცეში. ამ ბმულიდან შეგიძლიათ ჩემს მიერ მოძიებული სტილების არქივი გადმოწეროთ.

გადავიდეთ ინსტალაციის პროცედურაზე. ამისთვის დაგვჭირდება სტილის საინსტალაციო ფაილი (რომელიც უნდა გადმოვწეროთ ზემოაღნიშნული ბმულებიდან), კომპიუტერი, ფოტოკამერა საკომუნიკაციო კაბელით და მწარმოებლის მიერ შექმნილი სპეციალური პროგრამული უზრუნველყოფა - Canon EOS Utility
დავიწყოთ პროგრამული უზრუნველყოფით. ალბათ გახსოვთ, რომ თქვენს კამერას კომპლექტაციაში მოჰყვა პროგრამული უზრუნველყოფის საინსტალაციო დისკი. ამ პროგრამას სწორედ აღნიშნულ დისკზე აღმოაჩენთ. არ გაქვთ დისკი? არაუშავს, პროგრამა სრულიად უფასოდ ხელმისაწვდომია Canon-ის ოფიციალურ საიტზეც.

ისწავლე ფოტოშოპი ჩვენთან!

ისწავლე ფოტოგრაფია ჩვენთან!

დააინსტალირეთ პროგრამა Canon EOS Utility. მიუერთეთ კამერა კომპიუტერს და ჩართეთ პროგრამა.

ამ პროცედურის შემდეგ სამომხმარებლო სტილზე იხილავთ კონკრეტულ პროფილს. მეორე და მესამე სამომხმარებლო სტილებზე შეგიძლიათ ასევე დააინსტალიროთ თქვენთვის საჭირო სხვა ანალოგიური პროფილები. მათი შეცვლა სხვა პროფილებით ნებისმიერ დროს შეგიძლიათ. 

ამ სტატიის გაცნობის შემდეგ, იმედია დარწმუნდებით, რომ ფოტომოყვარულებში პოპოულარული და მუდმივად სადაო თემა, რომელიც ნიკონის და ქენონის ფოტოების ფერთა გამის განსხვავებულობას ეხება, მარტივად რეგულირებადია აღნიშნული სტილების გამოყენების გზით და მოსაწონი გამის მისაღებად კამერის ბრენდის გამოცვლას ნამდვილად არ საჭიროებს. ამასთან დაკავშირებით, იხილეთ ვიდეომიმოხილვა.

საუკეთესო სურვილებით, კახა ფხაკაძე.

სასწავლო ვიდეოკურსი ფოტოგრაფიაში

სტატიაზე (ტექსტი და გრაფიკული გამოსახულებები) დაცულია ყველა საავტორო უფლება. მისი გადაბეჭდვა, გადაწერა პუბლიკაციისთვის, სხვა ვებ-რესურსზე კოპირება (გარდა facebook-ზე გაზიარებისა) ანდა სხვაგვარი გამოყენება ავტორის ნებართვის გარეშე, გამოიწვევს საქართველოს კანონმდებლობით დადგენილ შედეგებს