2013 წლის 6 სექტემბერს ევროკავშირის პროექტის "ყურადღება, გაიღიმეთ!" წამყვანმა პარტნიორებმა მარინა ბორისოვამ და ივან შჩედრანოკმა საქართველოს ფოტოგრაფთა ასოციაციის ხელმძღვანელებთან ერთად თელავში ასოციაციის კახეთის რეგიონული ფილიალი მოინახულეს. სტუმრები ადგილზე გაეცნენ ფოტოგრაფთა მომსახურების სერვისცენტრს, დაინტერესდნენ ფოტომოყვარულთა აქტივობით და პრობლემებით, ვინაიდან ევროკავშირის პროექტის ერთ-ერთი მთავარი მიმართულება რეგიონებში ფოტოგრაფიის განვითარების ხელშეწყობა და შესაძლებლობების გაძლიერებაა.
რეგიონული ფილიალის ხელმძღვანელმა ქეთი იოსებაშვილმა სტუმრებს დეტალურად გააცნო ადგილობრივი ფოტომოყვარულების პრობლემები და განსაკუთრებული ყურადღება გაამახვილა პროფესიული განათლების აუცილებლობაზე. საუბარი ასევე შეეხო პროექტის ფარგლებში დაგეგმილი სემინარებისთვის რეგიონების მასშტაბით მსმენელთა ინფორმირებისა და შერჩევის საკითხებს.
შეხვედრის ბოლოს სტუმრებმა ალავერდის სამონასტრო კომპლექსი მოინახულეს და სამახსოვრო ფოტოები გადაიღეს.
