2019 წლიდან სფა იწყებს ყოველწლიური ფოტოწიგნის გამოშვებას. ნებისმიერი  ფოტოგრაფიული გაერთიანებისთვის აუცილებელი და პრესტიჟულია, ჰქონდეს წევრ ფოტოგრაფთა ნამუშევრების ფოტოწიგნი, რომელიც ერთგვარი სავიზიტო ბარათია როგორც თავად ასოციაციისთვის, ისე ფოტოგრაფისთვის, წარმოაჩინოს და გააცნოს თავისი შემოქმედება ფართო აუდიტორიას როგორც თავის ქვეყანაში, ისე საერთაშორისო ასპარეზზე. გვსურს, ეს პრაქტიკა უკვე ჩვენს ასოციაციაშიც გადმოვიტანოთ და გამოვცეთ ისეთი ფოტოწიგნი, რომლის მეშვეობითაც ადგილობრივ თუ საერთაშორისო საზოგადოებას, დელეგაციებს, სტუმრებს, უცხოელ მასპინძლებს და საერთაშორისო ფოტოგაერთიანებებს გავაცნობთ ჩვენ წევრთა შემოქმედებას. 

თავის მხრივ, ნებისმიერი ფოტოგრაფისთვის, დამწყები იქნება ის თუ უკვე მრავალი ჯილდოს და მიღწევის მფლობელი, ძალიან პრესტიჟულია, წარმოდგენილი იყოს კორპორატიულ ფოტოწიგნში, სადაც მის ფოტოგრაფიულ მიღწევებთან ერთად მისი საუკეთესო ნამუშევრები იქნება განთავსებული. 

ბოლო წლების განმავლობაში საქართველოს ფოტოგრაფთა ასოციაცია, როგორც ორგანიზაცია, სხვადასხვა პრესტიჟული საერთაშორისო ფოტოგაერთიანების (FEP, FIAP) წევრი გახდა. სფა მჭიდროდ თანაშრომლობს უცხოურ პარტნიორ ფოტოგაერთიანებებთან, ხოლო ასოციაციის წევრები ასევე არიან უცხოური ფოტოასოციაციების და გაერთიანებების წევრები. სამწუხაროდ, დღემდე არ გვქონია შესაძლებლობა, ასოციაციას და მის წევრებს ასეთი ვიზიტებისას საპასუხო საჩუქრად გადაგვეცა ნაციონალური ფოტოწიგნი. თავის მხრივ, არც წევრ ფოტოგრაფებს ჰქონდათ შესაძლებლობა, სხვადასხვა უცხოურ ფოტოგრაფიულ ღონისძიებებში მონაწილეობისას საკუთარი ნამუშევრები ასეთი ფოტოწიგნის მეშვეობით გაეცნოთ საზოგადოებისთვის. ამიტომაც, დადგა დრო, ერთ წიგნად გამოვცეთ და ყოველწლიურად განვაახლოთ ჩვენი წევრების შემოქმედება და ამით ხელი შევუწყოთ მათ წარმატებას და ცნობადობის გაზრდას ადგილობრივ და საერთაშორისო ასპარეზზე. შესაბამისად, გაიმართება ფოტოწიგნის პრეზენტაცია და მასში შესული ავტორების ნამუშევრების ფოტოგამოფენა. 

ფოტოწიგნის ელექტრონული ვერსია ასევე განთავსდება ვირტუალურ სივრცეში და დაეგზავნება საერთაშორისო ფოტოსაზოგადოებებს ბმულის სახით. სფა-ს სამხატვრო საბჭომ უკვე შეიმუშავა ფოტოწიგნის კონცეფცია,  კრიტერიუმები და მოთხოვნები, რომელსაც იხილავთ ქვემოთ მიმაგრებულ ფაილებში. გარდა ქვემოთ მოცემული ბმულებისა, სამივე ფაილის შემცველი ერთიანი არქივის გადმოწერა ასევე შეგიძლიათ ამ ბმულიდან.

სფა გისურვებთ წარმატებებს!