ძვირფასო ფოტოგრაფებო,

გაცნობებთ, რომ 9-13 ნოემბერს ქალაქ იზმირში (თურქეთი) იმართება მე-5 საერთაშორისო ფოტოგრაფიის დღეები, სადაც სხვა ქვეყნებთან ერთად მიწვეულია საქართველოს ფოტოგრაფთა ასოციაციაც. ფესტივალის ორგანიზატორია ეგეოსის ფოტომოყვარულთა და კინომოყვარულთა ასოციაცია, რომელთან თანამშრომლობის მემორანდუმი სფა-მ 2014 წელს, თბილისში თურქული ფოტოგრაფიის პრეზენტაციის ფარგლებში გააფორმა.
ფესტივალზე დამსწრეები მოისმენენ მოხსენებას ქართული ფოტოგრაფიის განვითარების შესახებ. ასევე გაიმართება ქართული ფოტოგრაფიის პრეზენტაცია. ვისაც გაქვთ სურვილი, თქვენი ფოტოები წარდგენილ იქნეს პრეზენტაციაზე ფესტივალის ფარგლებში, გთხოვთ ა.წ. 1 ნოემბრამდე მოგვაწოდოთ თქვენი ფოტონამუშევრები მისამართზე Photographers.ge@gmail.com. წერილის სათაურში მიუთითეთ "იზმირი", ტექსტში კი სახელი-გვარი როგორც ქართულად, ასევე ინგლისურად, საკონტაქტო ტელეფონის ნომერი. ფოტოების გამოგზავნით თქვენ ადასტურებთ, რომ სფა-ს რთავთ ნებას ჩართოს თქვენი ფოტონამუშევარი (ნამუშევრები) საერთო საპრეზენტაციო სლაიდშოუში და ერთჯერადად მოახდინოს საჯარო ჩვენება აღნიშნული ღონისძიების ფარგლებში.

ფოტონამუშევრის პარამეტრები: ფოტო გადაღებული უნდა იყოს ფოტოაპარატით, თემა - ნებისმიერი, ფორმატი jpeg (10), ფერის პროფილი: sRGB, დიდი მხარის ზომა - არანაკლებ 1280 პიქსელისა. ფოტოს არ უნდა ჰქონდეს ჩარჩო ან/და რაიმე სახის წარწერა. ასეთი ფოტოები არ განიხილება.

თითოეულ ავტორს შეუძლია წარმოადგინოს არაუმეტეს 5 ნაწარმოებისა, საიდანაც საპრეზენტაციოდ შერჩევა მოხდება სფა-ს მიერ.

ასევე თუ გსურთ, პირადად მიიღოთ მონაწილეობა ფესტივალში (საკუთარი ხარჯით), გთხოვთ გვაცნობოთ ზემოაღნიშნულ ფოსტაზე ა.წ. 1 ნოემბრამდე.

გისურვებთ წარმატებებს!